Botoks sadə prosedur kimi görünə bilər, lakin nəticənin təbii olması düzgün doza, düzgün inyeksiya nöqtələri və prosedurun təcrübəli həkim tərəfindən aparılmasından asılıdır. Dr. Səidə Dəmirova botoksu «sənət» adlandırır: məqsəd üz ifadəsini dəyişmək yox, daha təravətli və dincəlmiş görünüş yaratmaqdır.
Təbii botoks nə deməkdir?
Təbii botoksda mimika qorunur: qırışlar yumşalır, üz isə daha dincəlmiş və təravətli görünür. Keyfiyyətli nəticənin sirri düzgün doza, düzgün nöqtələr və fərdi yanaşmadadır.
Botoks nə vaxt təsir edir və nə qədər qalır?
Botoks adətən inyeksiyadan 1–3 gün sonra təsir göstərməyə başlayır; tam nəticənin görünməsi bir həftə və ya daha çox çəkə bilər. Müalicə olunan problemdən asılı olaraq effekt 3–4 ay davam edə bilər və təkrar inyeksiyalar ən azı 3 ay fasilə ilə aparılır.
Hansı yan təsirlər ola bilər?
- inyeksiya yerində ağrı, şişkinlik və ya göyərmə;
- baş ağrısı;
- göz qapağının və ya qaşın düşkünlüyü;
- təbəssümdə asimmetriya;
- gözlərdə yaşarma və ya quruluq.
Dr. Dəmirovanın vurğuladığı ciddi ağırlaşmalardan biri botoksdan sonra ptozdur: üst göz qapağını qaldıran əzələnin təsirə məruz qalması nəticəsində göz qapağı düşür. Botoks reseptlə istifadə olunan dərman vasitəsidir və yalnız səlahiyyətli, təcrübəli həkim tərəfindən tətbiq edilməlidir.
Uğursuz nəticənin qarşısını necə almaq olar?
- Prosedurdan əvvəl həkim konsultasiyası keçin.
- Doza və inyeksiya nöqtələri fərdi müəyyən edilməlidir.
- Estetik əməliyyat keçirmisinizsə, botoksun vaxtını həkiminizlə planlaşdırın; məsələn, blefaroplastikadan təxminən 2 ay sonra.
- Hamiləlik və əmizdirmə dövründə botoks adətən tövsiyə olunmur.
- Şəkərli diabet, zob və ya digər xroniki xəstəliyiniz varsa, bunu mütləq həkimə bildirin.
Botoks yalnız estetik məqsədlə edilir?
Xeyr. Botoks tibbin bir çox sahəsində müalicəvi məqsədlə də istifadə olunur: miqren, hədsiz tərləmə və bruksizm kimi hallarda. Bəy xəstələr daha çox baş və boyun ağrıları, hədsiz tərləmə ilə bağlı müraciət edirlər.
Mənbə: Mayo Clinic, "Botox injections" — mayoclinic.org (yeni pəncərədə açılır)